Nangape gipatay

Namatay gyod ang usa ka tawo human kini mabiktima sa pagpamusil sa wala mailhing mamumuno samtang naghigop kini og kape sa miaging gabii sa Camugao, Pinamungajan.

Ang biktima mao si Carmelito Salagoste Diwan, 30, minyo nga nagpuyo sa nahisgotang dapit.

Si SPO3 Romeo Jaranilla sa kapolisan sa nahisgotang lungsod nga gikahinabi sa Banat News miingon nga naglingkod lang sa ilang panimalay ang biktima nga naghigop og kape.

Matud pa ni SPO3 Jaranilla nga kalit lang mitumaw ang wala mailhing lalaki ug gipusil sa wala pa usab matino nga kalibre sa armas.

Dugang pa ni Jaranilla nga naigo sa tuong bahin sa dughan ang biktima nga maoy nakaingon sa hinanaling kamatayon niini.