Giluba samtang natulog

Patay gayod ang usa ka drayber sa traysikad kinsa nahinanok sa pagkatulog apan kalit lang giduol sa usa ka tawo nga nagdala og kutsilyo ug giluba ang liog sa miaging kaadlawon sa Lower Malibu, Wireless, Subangdaku, Mandaue.

Ang biktima mao si Eddie Lumapas, hingkod ang panuigon, ulitawo ug lumad nga nagpuyo sa maong lugar.

Ang suspetsado mao si Alberto Tranya, hingkod ang panuigon, ulitawo ug nagpuyo sa maong dapit.

Si SPO1 Alfredo Andales nga gikahinabi sa Banat News miingon nga giduol lang sa suspetsado nga nagdala og kutsilyo ug gidunggab ang liog sa biktima makadaghan nga higayon.

Human sa pagpanunggab, ang suspetsado dali usab nga mipahilayo sa maong dapit.

Dugang pa ni Andales nga gituhoan nilang paregla lamang ang gihimo sa suspetsado ngadto sa biktima.