Nalatayan og bus

Nalatayan og ligid sa atras sa usa ka bus pasaheruan ang usa ka 20 anyos nga lalaking giingong "misuong" sa nagdagan nga bus diha sa dalan South road sa Basak ning dakbayan kagahapon.

Patay diha-diha ang biktimang si Jeffre Cortez, ulitawo ug residente sa samang lugar human kini malatayi sa lawas sa Corominas Bus nga gimaneho ni Jonilo Solon, 43, residente sa San Miguel, Asturias.

Matud pa ni PO1 Elmer Deguro sa Traffic Group sa Cebu City Police Office, ang bus padulong na sa habagatang bahin sa lalawigan dihang gipara kini sa biktima diha sa gikahitaboan.

Giingong nangutana ang biktima kun sa Bato, Oslob ba ang biyahe sa bus apan dihang giingnan nga dili kini mobiyahe didto miarangkada na ang bus.

Apan sa kalit lang milagubo diha sa luyo, diha na nila nakit-ang napisat ang biktima. Si Solon tua na mitahan sa Pardo Police sa kahadlok nga tabangan og kulata.

Matud pa sa drayber nga misuong sa ilawom sa iyang bus ang biktima dihang mipadagan na siya.

Si Deguro nagkanayon nga naghukas ra og sinina ang biktima dihang nahitabo ang insidente.