Ang paggahin sa maong kantidad gihimo sa mga sakop sa konseho atol usab sa ilang regular session niadtong miaging adlaw.
Si Konsehal Wenceslao Gakit, chairman sa committee on budget and appropriation sa konseho sa maong dakbayan maoy nangamahan sa maong resolusyon ug mass motion ang ilang pag-uyon.
Ang paggahin natigayon human usab si Linda Ouano nga maoy unang ginang sa dakbayan ug mao usab ang representante sa ASEAN Summit organizing committee for beautification maoy nagpahibalo niadtong miaging adlaw.
Si Ouano sa iyang pagpadayag ngadto sa mga barangay kapitan atol sa binulan nilang panagtigum nga gihimo mipasabot nga dagkong ganti ang madawat sa mahimong mananaug nga barangay.
Matud pa niya nga kini gihimo sa kagamhanan sa dakbayan aron sa pagdasig sa mga barangay official ug mga lumolupyo sa pagpanglimpiyo ug pagpatahom sa ilang mga lugar.
Ang unang ganti makadawat og P100,000, ikaduha P75,000 ug ikatulo P50,000 usab ang ganti nga madawat gawas sa mga consolation prizes alang sa mga wala modaug nga barangay.
Gipasabot niya nga ang pagpatahum pinaagi sa pagpananom og mga misitas, mga kahoy sa kadalanan ug ang pagpanglimpiyo mao karon ang gikinahanglan sa 27 ka barangay sa dakbayan.
Kini gihimo alang sa pagdasig sa gihimong pagpangandam sa umaabot 12th Association of Southeast Asian Nation (Asean) Summit karong umaabot Disyembre.