Ang unang insidente nahitabo sa Sitio Malakurong, Usmad, Argao niadtong Domingo sa kaadlawon, samtang ang ikaduha didto usab sa Barangay Corte, Carmen, niadtong Sabado sa hapon dayon nang kilumkilom.
Ang biktima giila sa kapolisan sa Argao mao si Dindo Talleta, nga taga Mangga, Alcantara, giingon nanisko ug gipusil gawas sa diskohan nga nagbarugbarog kilid sa gi-parking nga motorsiklo.
Si Talleta nakaangkon og samad pinusilan sa iyang ulo agi sa wala pa matino nga kalibre sa armas nga maoy gigamit sa pagpusil sa wala mailhing tawo.Gidali kini pagdala sa Kintanar District Hospital sa Argao, apan gibalhin ra dayon dinhi sa tambalanan sa dakbayan sa Sugbo.
Si PO1 Rodrigo Pio sa Argao nga nahinabi sa Banat News miingon nga sa wala pa mahitabo ang pagpusil sa biktima, ang mga sakop sa Regional Mobile Group-7 nga naa magbase sa Sibonga nga nailhan lang nga sila si PO1 Casivan, PO1 Gomez, ug PO1 Roxas, mirekisa sa hawak ni Jimmy Geverola nga taga Obaob Argao, apan midagan kini og natagak ang 357 nga magnum ug unom ka buhing bala.
Matud ni PO1 Pio nga ila untang gigukod, apan nibalik sila si PO1 Casivas ug PO1 Gomez, tungod kay ngitngit na ang maong lugar.
Sa dihang mibalik na sila sa diskohan nakadungog sila og duha ka sunod-sunod nga buto sa armas ug ilang nakita ang lawas ni Talleta nga naglunang na sa daghang dugo.
Ang ikaduhang biktima giila mao si Marcelo Gako, 54, minyo nga taga Lanipga, Carmen.
Si Lanipga naigo sa iyang tuong nawong ug milapos sa wala nga nawong, agi sa .45 nga kalibre, nga maoy gigamit sa suspetsadong si Joshua Paring, hingkod nanimuyo sa Barangay Corte.
Ang kapolisan nakakuha og usa ka kabhang sa kalibre .45, sa nahitaboan. Si Paring nadakpan sa kapolisan sa Carmen gahapon sa buntag ug gidala na dinhi sa Cebu City Police Office aron ipaubos sa paraffin test aron sa pagtino nga nakapabuto ba gayod ang suspetsado.