Matud ni Cebu 2nd Engineering District Head Daisy Toledo, ang 35 ka mga kawani gipang-apod-apod sa matag 3.5 ka kilometro sa mga national road sa unang distrito nga kasamtangang gimintenar sa maong ahensya.
Matud ni Toledo mikabat og 124 ka kilometers ang national road nga gimentinar nila gikan sa siyudad sa Talisay ug mga munisipyo sa Minglanilla, Naga, San Fernando, Carcar ug Sibonga.
Adunay madawat nga P231 sa matag adlaw nga trabaho ang mga kawani og gibana-banang mokabat og P711,480 ang masweldo sa matag upat ka bulan.
Gitataw ni Toledo nga road side maintenance lang o mga pagmantenar sa kadaplinan sa kalsada ang mga trabahoon sa mga kawani.
Naglakaip niini ang pag-atiman sa mga tanum o kahoy sa daplin sa kalsada, pagmentinar nga limpyo ang kadaplinan apil ang pag-ugkat sa mga nakabalda ug mga basura sa mga drainage ug mga canals.
Nasayran nga sa tibuok rehiyon 7 mokabat og 560 ka mga kawani ang mahatagan og trabaho sa maong proyekto sa kada upat ka bulan.
Sila maoy moatiman sa 1,960 kilometer national roads nga anaa sa mga probinsya sa Cebu, Bohol, Oriental Negros ug Siquijor.
Adunay gigahin nga P11 milyones para suweldo sa mga trabahante sa matag upat ka bulan.