Ang biktima giilang si Bachichangchingchang, 24, molupyo sa usa sa mga barangay sa dakbayan sa Lapulapu kinsa nagkadugo ang ulo ug bun-og kaayo ang nawong nga miabot sa ilang balay ug nabangalan sa iyang mga kabanay.
Dihang gipangutana bisan dili maka-istorya apan pinaagi sa iyang senyas nasaysay sa biktima ang iyang gidangatan sa mga kamot sa silingan nianang gabhiuna ug miuban sa kapolisan pagtultol sa balay sa suspek.
Matud pa ni PO2 Christian Torres sa pakighinabi sa Banat News, bisan amang ug bongol ug lungay ang panglawas sa biktima walay deperensya ang pangisip niini, gani ang mga kabanay niini nga sukad pa kaniadto mao nay kauban niini nakasabot sa gipangsenyas niini.
"Gihagkan-hagkan daw, unya dihang nisukol siya gisukmag siya sa nawong, wala kuno siya mahuboi kay misukol lagi siya unya giyak-an pa gyud siya ug gikulata," asoy pang Torres nga mibase usab sa interpretasyon sa kabanay sa biktima samtang nagsaysay pinaagi sa senyas ang biktima.
Natultolan ang balay sa suspek pinaagi usab sa biktima ug nailhan usab kini dihang gimustra sa biktima nga dunay deperensya ang mata sa asawa sa misuway og lugos kaniya.
Nianang pagka-alas 9 sa buntag, usa ka Mario Cañedo, 32, minyo nga residente usab sa barangay sa biktima ang miadto sa buhatan sa Lapulapu Police ug nagpailang siya maoy gitumbok nga suspek sa pagsuway og lugos sa biktima apan mihimakak hinuon sa kalambigitan niini.
Si Torres nagkanayon nga iyang gipatawag ang biktima aron maklaro ang pangangkon ni Cañedo apan giingong diha pa lang sa sakyanan ang biktima nagkisi-kisi na kini ug mitudlo samtang naghilak sa suspek nga maoy misuway'g lugos ug mikulata kaniya.
Sumala pang Torres nga napriso na ang suspek gumikan sa kasong pagpangawat apan gihatagan kini og probation maong nakagawas.
Midumili usab pagdala sa Pink Room sa Vicente Sotto Memorial Medical Center ang kabanay sa biktima gumikan kay giingong nakasiguro gyud silang wala mahilabti ang biktima base sa pagsaysay niini pinaagi sa senyas.
Dugang pa ni Torres nga kagahapon usab sa buntag sa wala pa ang pagreklamo ni Cheche duna nay midangop sa ilang buhatan ug mireklamo batok kang Cañedo nga maoy nangawat sa iyang mountainbike ug airpump nga nagkantidad og P7,500.
Usa ka Gilbert Batarilan, 23, ang mitug-an nga nawala diha sa iyang gibutangan sulod sa ilang balay ang maong bisekleta ug matud pa ni Torres dunay nakatudlong si Cañedo maoy nakit-ang mikuha niini.