Bus vs trak, unom naangol

Unom ka mga tawo ang nangaangol lima niini anaa sa grabe ang kahimtang sa nahitabong panagbangga sa usa ka Izusu Elf ug bus de pasaheroan sa miaging adlaw alas 3 sa hapon didto sa Barangay Bahay, National Hi-way Poblacion Sibonga Sugbo.

Ang Izuso Elf ug ang bus de pasaheroan nga BB Gemma gikan sa managlahing direksyon.

Ang Izuso Elf nga gimaneho ni Jerry Genilo, 20, ulitawo, sakay ang lima nga sila si Jonas Lubes, 10, Edgardo Delos Reyes, 33, Dionedes Tapian, 20, Ranal Wagan, ug Natividad Aranilla 65, ang unom pulos taga Lungsod sa San Fernando.

Samtang ang drayber sa bus giila sa kapolisan mao si Sabiano Dumayhag, hingkod, nga taga Barangay Balod, Dalaguete.

Si SPO3 Ramon Padilla sa Sibonga Police Station sa pakighinabi sa Banat News, niingon nga nagdagan ang Elf sa National Hi-way paghidangat sa maong lugar kalit lang ni overtake si Dumayhag sa gisundan niining traysikol, ug nawad-an og kontrol sa manibela si Dumayhag, hinungdan nga didto kini misampak sa Elf nga gimaneho ni Genilo.

Bugtong si Aranilla ang nakaangkon og gamay nga samad-samad ug pangos sa iyang kalawasan, ang lima lakip na si Genilo ang nakaangkon og dagkong samad, bun-og sa ilang kalawasan, nga daling gihatod sa Don Vicente Sotto Medical Center ug padayon pang giatiman sa mga doktor.