Si Entera, hingkod ang panuigon kasamtangang nagpuyo sa Tugas, Mambaling ning dakbayan maoy gitumbok sa tulo ka testigo lakip na niini ang usa sa mga naangol nga si Allan Batitay.
Sa pagpresentar kagahapon ni Inspector Mario Monilar hepe sa Homicide Section kang Entera ngadto ni CCPO director Melvin Gayotin gipanghimakak sa suspek ang kalambigitan sa pagpatay kang Rainer Rico.
Si Rico uban sa iyang amigong si Batitay kasamtangang naglakaw diha sa dalan P. Del Rosario ning dakbayan niadtong Enero 15, 2006 dihang kalit nga gibanhigan sa ilang gitumbok nga si Warren Quijano alyas Waway nga taga Vampire, Duljo-Fatima ning dakbayan.
Si Entera nagkanayon nga dili siya si Warren Quijano kinsa nabaniog sa kapolisan nga hitman sa Tau Gamma Phi fraternity ug nahibulong nalang kini dihang dunay migawas nga warrant of arrest nga naa sa pangalan ni Warren Quijano apan siya maoy gidakop.
Matud pa sa mga imbestigador sa Homicide Section nga diha makit-i sa mga testigos sa telebisyon ang hulagway ni Entera dihang mitahan kini sa buhatan ni Mayor Tomas Osmeña aron paglimpyo sa iyang pangalan tungod sa gipagawas nga listahan sa kapolisan sa mga wanted nga mga fratman sa dakbayan.
Sa pakighinabi sa mga tigbalita nagduda si Entera ug mga kabanay niini nga gibayran ang mga testigo aron siya maoy iduot ug midugang nga dunay usa ka polis (ngalan wala nila ibutyag) nga nasuko kang Entera gumikan sa wala niini pagtahan ngadto sa ilang buhatan kaniadto tungod kay didto siya mitahan sa buhatan sa mayor.
Ang warrant of arrest giluwatan ni Judge Simeon Dumdum Jr.batok ni Warren Quijano, sumala pa ni Gayotin nga adto nalang sa korte idepensa ni Entera ang iyang pangangkong dili siya si Quijano.