Usa ka reklamo ang nadawat sa opisina ni Konsehal Edgardo Labella kabahin sa usa ka lokal nga website nga nagbaligya og mga hulagway sa mga babayeng pasekretong nakuhaan og mga hulagway nga wala mananghid sa mga hingtungdan.
Sa gihimong resolusyon ni Konsehal Edgardo Labella, gibatbat nga direktang gilapas sa mga wala pa mailhing mga tawo nga mogamit og cellphone camera ang privacy sa maong mga babaye. Pag-surf sa Banat News sa http/cameramanyak. forumsplace.com ginamit ang usa ka fictitious nga pangalan ug e-mail address bisan wala makumpleto ang profile nga kinahanglang i-fill up nakasulod sa maong website ang Banat News.
Ang mga gipamutang nga "photo teasers" sagad gikuha sa sekretong paagi. Sa pagkakaron ang labing sikat nga gadget ug daling mapalit mao ang mga cellphones nga dunay kamera.
Dunay mga babayeng (ang uban kanila mga minyo ug mga dalagita) wala makahibalong dunay gitiong cellphone camera diha sa ilang bilahan ilawom sa sayal samtang sila nag-shopping o ba kaha nagsakay og PUJ ug nangasilyas.
Ang mga miyembro kinahanglang magparehistro ug mobayad (base sa posting sa mga miyembro nga naghisgut og GCash sa Globe ug sa Smartmoney sa Smart ug ingon man bank accounts)
Sa Republic Act No. 9208 kun E - Commerce Law gidid-an ang mga local website operators nga mopagawas og pornographic pictures ug mga videos diha sa net.
Samtang ang dakbayan sa Sugbu dunay ordinansang section 5.5, City ordinance No. 1901 kun ang Internet Ordinance sa Cebu City nagmando sa tagdumala og tag-iya sa mga internet café's magbutang og filtering software kun salaan nga mobabag sa mga pornographic websites nga makasulod sa ilang mga net.
Nunot niini awhagon pinaagi sa usa ka resolusyon sa konseho ang National Bureau of Investigation 7 aron imbestigahon ug subayon ang operator sa maong website. - Uban sa taho ni Riena P. Fugoso