Gitug-an ni Mayor Tomas Osmeña atol sa press conference kagahapon sa udto nga bisan siya mismo ang nakadawat sa maong impormasyon kabahin sa pag-amutay og salapi aron lang pahilomon si dela Victoria.
Giangkon sa mayor nga wala pa siya karuy konkretong ebidensiya batok niining maong nahipos niyang kasayuran apan kumbinsido siya nga dako gyud nga kantidad ang naglambigit sa maong operasyon.
Sigun sa report miabot og P1 milyon ang nahipos nga kuwarta sa maong grupo nga maoy giingong gisuhol alang sa pagpapatay kang dela Victoria.
Laing impormasiyon nga nahipos sa mayor mao ang gikatahong pagpanuburno sa maong mga commercial fishing operators ngadto sa pipila ka mga mayor ug opisyal didto sa amihanang bahin sa Sugbo aron lang katugotan nga magpadayon ang ilang ilegal nga panagat sa mga nahisgutang lugar.
Wala hinuon moklaro og tubag si Osmeña dihang gipangutana sa mga tigbalita kun ang pagtanyag niini og usa ka milyon ka pesos nga ganti sa makatug-an sa mastermind sa krimen ang balos ba kini sa nahipos niyang report nga nagtampotampo og salapi aron ipatumba si dela victoria.
Si Osmeña mipasalig na nga mopagawas sa gitanyag niyang P200 mil ngadto sa informant nga miresulta sa pagkasikop sa gitumbok nga triggerman ni dela Victoria nga si SPO1 Marcial Ocampo.
Apan ipasusi una niya sa mga sakop sa CIDG-7 kun si kinsa ang angay'ng makadawat sa maong ganti.