Si Cabaral sa pakighinabi sa Banat News mitug-an nga ibase sa merito ug kwalipikasyon sa rekrut ang pagpili kanila human sa higpit nga pagsukit-sukit sa ilang pagkatawo ug physical nga panglawas.
Matud pa ni Cabaral nga wala na karon ang korupsyon sa pagpili sa mga police candidates ug kun duna may mga aplikanteng mangayo sa ilang mga ginikanan og dagkong kwarta aron 'ibundak' bugti nga makasulod gyud pagkapolis posibleng nabiktima kini sa mga kurakot nga mga polis ug kinahanglang itug-an kini dayon ngadto sa ilang buhatan.
"Akong gipasalig sa atong mga ginikanan nga wala silay balayranan, kay ang atong pagpili base on merits, qualifications and rankings," asoy pang Cabaral.
Kagahapon nagdasok ang 565 ka mga aplikante nga gilangkuban sa 499 ka mga lalaki ug 66 ka mga babaye. Si Chief Supt. Eduardo Gador ang direktor sa Police Regional Office 7 kagahapon mitug-an nga nagkinahanglan sila og 150 ka bag-ong polis.
Sa pagkakaron nirekrut ang PNP og 3,000 ka mga bag-ong polis karong unang semester ning tuiga ug gipaabot nga karong bulan sa Oktubre mo-rekrut na usab og gibana-banang 4,000 ug gipaabot nga duna na usab bag-ong quota ang PRO7.
Matud pa ni Gador nga nagkinahanglan karon ang PNP ug daghang mga polis ilabi na ang mga babaye nga ibutang diha sa mga women's desk ug uban pang posisyon sa ilang organisasyon.
Giangkon ni Gador nga bisan pa sa kadaghan sa ilang gipangrekrut matag tuig wala gihapon kini makasibo sa ideyal nga ratio aron mabantayan ang katawhan batok sa mga dautang elemento gumikan kay daghan usab kaayo ang mi-retire, nataktak ug namatay nga mga polis.