Giaprobahan kagahapon ang gipasar nga resolusyon atol sa sesyon sa provincial board nga nag-awhag kang Gobernador Gwendolyn Garcia nga motabang pag-awhag sa mga lokal nga ahensiya sa kagamhanan nga mohatag og dugang salaping ganti ngadto sa makahatag og impormasyon alang sa pag-aresto sa gunman ug mastermind sa pagpatay kang dela Victoria.
Si Bokal Victor Maambong kinsa maoy nangamahan sa nahisgutang resolusyon nagkanayon nga dili siya motuo nga dunay kalabutan ang pagpasira sa Visayan Marine Triangle ang hinungdan sa pagpapatay ni dela Victoria.
Matud ni Maambong nga dili usab siya motuo nga dunay kalabutan ang commercial fishing sa maong insidente apan posibleng dunay kalabutan sa iyang trabaho sa Carbon Market ug sa pagpanggukod niini sa mga naghimo og mga blasting caps nga gamiton sa paghimo og dinamita.
Apan bisan paman niini giangkon diha sa resolusyon nga si dela Victoria usa ka dakong kawad-on sa lalawigan sa Sugbu kun ang pagkamatinud-anon niini sa trabaho ug serbisyo publiko ang hisgutan.
"The Province of Cebu unequivocally condemns the killing of "Jojo" dela Victoria as an act of bestiality that is abhorred by all modern and civilized society. Verily, Cebu has lost a fearless fighter, consumate advocate and ideal public servant," tipik sa maong resolusyon.
Gibutyag ni Maambong nga suod niyang higala si dela Victoria kay fraternity brother silang duha ug diehards sa ROTC sa University of San Carlos.