Mga paryente og 'buang' ikiha sa city hall

Pasakaan og kaso ug paningkamotan nga mabilanggo sa kagamhanan sa dakbayan sa Sugbo kadtong mga paryente ug ginikanan sa mga psychotic vagrants kun mga buang-buang nga pasagdang maglatagaw ug magpakilimos sa mga kadalanan dinhi sa dakbayan sa Sugbo.

Ang siyudad sa Sugbo pinaagi sa Cebu City Anti Mendicancy Board maoy mangusog alang sa pagpasaka og kaso batok niadtong mga ginikanan ug kaparyentehan nga magpasagad sa mga tawong grasa nilang kadugo nga moresulta nalang hinuon sa pagpakilimos diha sa kadalanan aron makakaon.

Nunot niini, giaprobahan na usab sa konseho ang gipalabang nga resolusyon ni Konsehal Gerardo Carillo, action officer sa Anti Mendicancy Board nga naghatag og pasidaan ngadto sa mga paryente sa maong mga tawo nga makililimos nga dili kini pasagdan aron dili mapasakaan og kaso og peligro pang mabilanggo.

Himuong basihanan sa siyudad sa pagpasaka og kaso batok sa mga paryente unya sa mga psychotic vagrants mao ang Akta Republika 7610 nga gitawag og "Special Protection of Children Against Child Abuse,Exploitation and Discrimination Act."

Gipadayag ni Carillo nga ubos ning maong balaod ang psychotic vagrant gikonsiderar kini nga sama sa usa ka bata nga wala pay hustong panimuot tungod sa diperensyadong panghuna huna niini.