Si Santiago giubanan og usa ka graft investigator nga maoy nagsilbi nga stenographer sa gipahigayon niyang fact-finding inquiry aron sa pagsuta sa katinuoran sa reklamo nga ilang nadawat gikan sa usa ra usab ka molupyo sa nahisgutang barangay.
Ang secretary sa Lorega nga si Milagros Merino ug ang barangay revenue personnel nga si Edgar Nillas maoy target karon sa imbistigasyon nga gisugdan na sa Ombudsman.
Ang mireklamo batok ni Merino mao si Joan Enriquez, kawani sa barangay nga nadestino sa Gender and Development (GAD), kinsa nakabantay sa binuang ug maoy nakakuha ug pasiunang ebidensya.
Ang unang ebidensya nga nakuha ni Enriquez mao ang resibo nga giisyu sa barangay secretary ngadto sa usa ka Arcadio Cortes, kinsa mibayad og P500 nga business clearance kaniadtong Enero 2.
Apan sa triplicate copy sa maong resibo, nagpakita nga ang gibayran ni Cortes ngadto sa barangay dili P500 kon dili P50 ra.
Kini usab ang nahitabo sa P500 nga gibayad ni Beverly Yu, tungod kay basi sa triplicate copy sa maong resibo dili na kang Beverly Yu ang ngalan, kon dili iya sa usa ka "Rachel Bernandeza" ug P50 na lang ang giingong nadawat sa barangay.
Daghang mga resibo nga naisyu sa barangay ngadto sa mga magbubuhis ang gidala nila ni Santiago kay matud pa palapdan nila ang imbestigasyon sa kaso.
Gimahay ni Santiago ang barangay treasurer nga si Rolando Maloloy-on nga maoy naghatag og pagtugot nga ang secretary ug ang revenue personnel maka-isyu og resibo nga unta dili man sila "bonded" base sa lagda sa Commission on Audit.
Nakapanglingolingo si Santiago nga nagtan-aw sa pasiunang ebidensya nga iyang nakita ug naglaum nga ang barangay treasurer wala usab makahimo og susamang binuang.
Matud pa ni Santiago nga ang matag resibo nga gibinuangan nagkahulogan og usa ka "count" sa kaso. Ang kaso posible nga malversation of public funds through falsification of public documents.