Si Konsehal Edgardo Labella tsirman sa committee on laws sa konseho sa dakbayan sa Sugbo mipanday og ordinansahon nga magpahamtang og silot batok niadtong mga tindahan o cellshop nga mamaligya o magpaabang og mga unit sa cellphone ingon man accessories nga kinompra gikan sa ilegal nga mga distributors.
Gibasihan niini sa konsehal ang Local Government Code of 1991 nga naghatag og gahum sa mga lokal nga kagamhanan aron kapanalipdan ang interes sa mga legal nga distributors.
Pinasubay usab kini sa memorandom circular gikan sa National Telecommunication Commission (NTC) nga nagdili sa mga manindahay og cellphone accessories pagkompra sa mga peke nga butang gikan sa mga ilegal ug walay klarong tinubdan.
Kun maaprobahan ang maong balaodnon ni Labella kadtong mga tindahan o cellshop nga makalapas niini makabayad na unya og multa nga P1,500 sa unang kalapasan, P3,500 sa ikaduhang higayon ug P5,000 alang sa ikatulong higayon ug mahimo pang i-revoke ang business permit niining giisyu sa dakbayan sa Sugbo ug NTC.
Subay sa nahipos nga impormasiyon sa konsehal misi-aw og maayo karon ang pagpamaligya sa mga cellphone unit ug accessories gikan sa mga dili otorisadong distributors gumikan kay mas barato kini kun itandi sa mga orihinal apan wala lay kasiguro-an ang tagal niini.