Si Provincial Board member Juan Bolo kinsa maoy tsirman sa komitiba sa edukasyon nagkanayon nga iya nang awhagon pinaagi sa usa ka resolusyon ang mga kadagkoan sa Department of Education DepEd-7 aron mangonsulta ngadto sa publiko bahin ning maong isyu.
Ang maong sugyot dugaydugay nang gipalanog nila ni Senate President Franklin Drilon ug Senador Juan Flavier.
Pipila sa mga katarungan nganong angayang ibalhin ang pag-abli sa klase ngadto sa Septiyembre mao nga ang buwan sa Hunyo maoy tingsugod sa panahon sa ting-uwan matag tuig.
Ang kahasol sa mga ginikanan ug mga estudyante, usa sa mahimong hinungdan nga daghan kaayong suliran sa mga pamilya nga makababag usab sa dinalian kaayong pagsugod sa pormal nga klase sa matag tulonghaan.
Ang laing hinungdan mao nga sa Estados Unidos namatud-an ang pag-abli sa klase sa buwan sa Septiyembre, maayo og resulta busa mas maayo nga sagupon usab kini dinhi sa nasud.
Kon ugaling kini ikapatuman, walay problema malagmit ang bahin sa mga ginikanan tungod kay igo lang silang motuman sa gimbut-an sa kadagkoan sa eskuylahan.
Apan tungod kay umolon man ang balaod niini, ginikahanglan gyud ang usa ka opisyal nga konsultasyon aron nga kon dunay mosuway pagsupak, ilang ikapabuhagay atubangan sa publiko ang mga katarungan ug hinungdan.
Pinaagi sa "public hearing" makontento ang kadaghanan sa mahimong kausaban unya sa pag-abli sa klase sa mga tulonghaang iya sa gobiyerno ug pribado.
Alang kang Bolo nga iyang paaboton ang reaction sa mga kadagkoan sa DepEd kon kaaprobahan na sa hunta probinsyal ang iyang resolusyon kalabot niini.