Kini maoy resulta sa gihimong mokapin sa usa ka semana nga pakisusi sa mga sakop sa Revenue Monitoring Task force nga gipangulohan ni Cristopher Ong nga gitapos niadtong adlaw'ng Miyerkules.
Gibutyag ni Ong dihang nahinabi sa Banat News nga sa 45 ka mga gasoline station nga ilang na-inspeksyon dinhi sa dakbayan ilahang nadiskobrihan nga dunay kapin sa 20 niini ang wala ma-calibrate ang gas pump ug kulang ang matubil sa ilang mga kustomer.
Nasayran nga mokabat ngadto sa 50 mililitro ang kulang sa matag litro nga itubil sa maong mga gas station hinungdan nga girekomendar kini sa maong task force nga pabayron og multa.
Gipasabot ni Ong nga ila kining gihimo aron pagsusi kun insakto ug migamit ba gyud og calibrated nga mga gas pump ang maong mga kompaniya aron pagpanalipod sa interes sa publiko.
Pinasubay usab kini sa ordinansa sa dakbayan nga nag-obligar sa pagpabayad og multa sa mga mogamit og dili calibrated nga gas pump ingon man sa mga tikasang timbangan.
Ubos ning maong ordinansa, ang masakpan og pamultahan P1000 sa unang paglapas ug P2,000 ngadto sa P5,000 sa ikaduha ug mosunod pang kalapasan og depende sa mayor kun kanselahon ba ang business permit niini.
Gikonpirmar ni Ong nga ang mga gas station nga nasakpan nilang nakalapas sa ordinansa mibayad na kini karon og multa sa City Treasurer's Office sa City Hall.