Ang maong mga kawani mao kini ang upat sa unom ka mga kaswal nga kawani sa City Hall nga gitaktak sa ilang serbisyo human masakpi nga nikobra sa ilang sweldo niadtong petsa kinse sa Enero bisan pa man og wala pa ma-renew ang ilang appointment.
Apan nakahukom si Osmeña nga i-reconsider ang mao niyang desisyon og gipabalik niya ang upat sa unom ka kawani human iyang nasuta nga wala kiniy kalambigitan pagmaniobra sa mga dokumento aron makobra ang ilang suholan.
Apan kagahapon nahibaw-an sa mayor nga hangtud karon wala gihapon ma-reinstate kon mahibalik sa serbisyo ang maong upat ka kawani hinungdan nga gitawagan dayon niya ang labaw sa personnel department sa City Hall nga si Atty. Ralph Sevilla.
Didto pa nahibaw-i sa mayor nga wala gihapon makabalik sa trabaho ang maong mga kawani gumikan kay gipaabot pa man ni Sevilla ang resulta sa imbestigasiyon.
Apan gimanduan kini ni Osmeña nga ipahimo dayon ang appointment sa maong mga kawani aron makabalik sa trabaho sa daling panahon.
Hinuon tun-an pa sa mayor kon himoon bang retro-active ang paghatag sa suholan sa maong mga kawani.