Gipusil sa tangkugo, bala milagbas sa mata, patay

Wala na makamata gikan sa iyang pagkatulog ang usa ka tricycle driver human gipusil sa tangkugo diin ang bala milapos diha sa iyang walang mata nga nakaingon sa iyang kamatayon diha sa dalan F. Gonzales sa barangay Ermita ning dakbayan.

Wala na matabang si Borlaan Fernando dela Piesa, 36 anyos, minyo nga taga Sitio Latasan, barangay Labogon, siyudad sa Mandaue diha sa tambalanan gumikan sa kagrabe sa igo niini.

Si PO2 Julius Mabunay sa Crime Against Person Section (CAPS) mitug-an sa Banat News nga naghigda lang ang biktima sa gi-parking niining tricycle sa maong dapit dihang kalit gipusil sa wala mailhing lalaki.

Human sa maong pagpamusil ang suspetsado ang dali usab nga nakasibat pahilayo sa maong dapit dihang misagol sa bagang mga tawo.

Gihimo karon sa kapolisan sa maong dakbayan ang follow up sa maong pagpamusil aron sa pagsuta gayod sa hinungdan niini. - Romeo T. Limpangog