Natigayon kini human sa gipatawag nga tigum sa mga kapitan nga sakop sa liga ni ABC National President James Marty Lim nga nituyo gyud pagbisita sa Sugbo niadtong miaging adlaw aron pagtudlo og mga temporaryong opisyal sa ABC ning dakbayan.
Sa gipahigayon nga botasyon napili si Estella ug kapitan Roberto Cabarrubias sa Basak Pardo isip presidente ug besi presidente nga walay miatbang kanila sa maong posisyon.
Samtang napili sila si Kapitan Mario Susaya sa Basak San Nicolas isip secretary, Rodegilio Arinasa sa San Jose isip treasurer ug sa pagka Press Relation Officer (PRO) napili sila si Joel Sable sa Suba ug Benjamen Zabate sa Sawang Calero.
Sa pagka board of directors napili sila si Lendon Fermo sa Cogon Pardo, Romeo Ocarol sa Pasil, Marciano Ando sa Carreta, Roger Ruizo sa San Roque ug Frank Benidecto sa Zapatera.
Sa tanang mga opisyal sa ABC bugtong si Lorenzo Basamot sa Camputhaw nga maoy auditor sa liga mao lang ang wala maapil sa 90 ka adlaw nga preventive suspension.
Human sa 90 ka adlaw nga preventive suspension automatic nga mobalik sila si ABC president Eugenio Faelnar, ABC Vice President Sesinio Andales ug lain pang walo ka opisyal sa liga sa ilang katungdanan.
Samtang miduso og manisfestation si Andales nga nag-awhag sa Sandigan bayan nga ipaklaro niini kun nganong giapil ang maong suspension order sa ilang pagka kapitan sa barangay nga unta ang maong kaso naglambigit lang sa ilang pagka opisyal sa ABC.
Ang kanhi project engineer sa ABC Leah Rondez maoy misang-at og kaso sa maong mga opisyal sa liga gumikan sa gi-claim niini nga reimbursement sa iyang gasoline allowance nga mobalor og P4, 300.