Ang mga rescuers ug mga sakop sa media lakip na ang Banat News team daling gi-airlift sa nagpuli-puling duha ka mga Chinook helicopters diha sa kilid sa agianan sa dakong baha nga maoy gikuykoy sa mga Taiwanese, Malaysian ug mga Pilipinong mga rescuers.
Duha palang ka patay'ng lawas nga nagsugod na og kadugta ang nakuha ug nadala sa Chinooks dihang sa pagbalik niini daling gipasakay ang mga tawo diha sa site ug gidala og balik sa mas luwas nga lugar nga mao ang command post diha sa pangpang sa Lawigan River sa habig sa barangay Tambis Uno. Matud pa ni Lt. Col. Raul Farnacio ang deputy commander sa rescue operation sa pakighinabi sa Banat News dunay dakong baha nga nagpadulhog gikan sa midahiling bahin sa Mount Can-abag padulong sa gikahimutangan sa mga rescuers ug duha ka back hoe nga nagkuykoy diha sa tiilan sa maong bukid.
Ang mga heavy equipment diha nanguykoy duol sa gituuhang gikahimutangan sa tunghaang dunay 246 ka mga tinun-an ug unom ka mga magtutudlo ug dugang 42 pa ka mga bata.
Bisan gani sa taga hawak nga tubig ug lapok nga gikahimutangan sa mga Pilipinong rescuers ug mga Taiwanese nga nagtabang pagkarga sa patay'ng lawas sa usa ka wala mailhing babaye mitugpa gihapon ang Chinook sa maong kalapukan diin gikamang nalang og tulod pasulod sa luyong pultahan sa Chinook ang patay'ng lawas nga gibutang sa usa ka stretcher.
Mga rescuers nagsuot na og mask ingon man mga gwantes apan ang baho dili ang dakong problema para kanila kundili ang grabeng kalawom sa lapukan nga ilang gitaak.
Samtang ang bag-ong nangabot nga 9 man- rescue team gikan sa nasud sa Turkey nga gipanguluhan ni Osgur Bozoglu niadtong nakalabay'ng Miyerkules sa buntag mipadayag nga lisod kaayo ang sitwasyon nga ilang naagian dinhi sa Guinsaogon. Si Tolga Bengi, usa sa mga sakop sa Turkish rescue team sa pakighinabi sa Banat News mitug-an nga naanad na hinuon sila sa nagkalain-laing sitwasyon sa mga kalamidad.
Matud pa ni Bengi nga wala sila magdala og mga bug-at nga kagamitan gawas lang sa mga "handy power tools" gumikan sa gilay-on sa ilang nasud apan ang ilang presensya aron makatabang mao ray ilang tumong.
Kagahapon ang mga sakop sa Philippine Navy sayo pa kaayong mitangas sa site dala ang duha ka mga K9 aron subling mangita og mga survivors.
Niadtong milabay'ng Miyerkules sa hapon, ang mga rescuers gikan sa Sugbu uban sa mga sakop sa Army nakaugkat og buhing manok ilawom sa usa ka gituuhang balay nga natabunan diin nakuhaan usab og mga litrato sa mga tawo nga gituohan usab nga maoy nagpuyo sa maong lugar.