Kagahapon gisugdan na ang pagpakuykoy pag-usab sa mass grave nga gilubngan karon sa 42 ka mga nadugta na nga mga lawas gumikan kay matud pa nga buot ilhon sa mga kabanay nga nangabot ang mga lawas.
Si Mayor Maria Lim sa pakighinabi sa Banat News nga ang pagkuykoy sa mga lawas dili lang para sa pag-ila sa mga kabanay nga nangabot kundili lakip na ang pagkuha og fingerprints sa mga biktima aron magamit sa umaabot.
Ang mga sakop sa Scene of the Crime Operation Region 8 nangabot na niadtong milabayng gabii ug gisugdan na ang pagpanguha sa fingerprints sa mga patay hangtud kagahapon.
Gisugyot karon nga ilubong nalang ang mga biktima og dungan apan ibutang sa linain nga mga lungag gumikan sa hangyo sa kabanay.
Gumikan sa kahuot sa sam-ang sa Malibago, matud pa ni Lim nga adto nalang ilubong ang mga patay'ng lawas nga maugkat pa sa barangay Catmon nga karon gihinay-hinayan na usab og pabiya ang mga residente gumikan sa peligro sanglit duol kini sa Guinsaogon.
Sa pagkakaron duna nay 84 ka mga patay'ng lawas nga naugkat gikan sa site samtang padayong gikuykoy sa hiniusang mga rescue teams gikan sa Espanya, Malaysia, Taiwan, Japan ug mga Pilipinong rescuers nga nangabot.
Ang Espanya mipadala og upat ka K9 dogs aron makatabang sa pagpangita sa mga nalubong samtang ang mga Taiwanese, Malaysians nagdala og mga bag-ong ekipo.
Kagahapon ang nadugangan na sad ang talaan sa mga missing human mangabot ang mga kabanay nga tua namuyo sa Manila ug mipahibalong duna silay mga kabanay nga namuyo sa maong lugar apan wala maapil sa talaan.
Sa susamang kalambuan, daghang mga tawo ang mipahimulos sa higayon pinaagi sa pagpangayo og hinabang sa mga evacuation centers bisan wala sila magpuyo sa Barangay Guinsaogon.
Kini maoy gibutyag ni Social Welfare Officer 2 Mercy Pacha sa pakighinabi sa Banat News kagahapon, matud pa niya nga dunay mga kabanay sa mga natabunan nga gikan pa sa Manila ug ubang dapit nga anha modangop sa evacuation centers
Gawas nga modangop moapil pa kini og pangayo og kung unsay madawat nga hinabang gikan sa relief operations kini bisan wala na sila magpuyo sa maong barangay.
"Dili gyud na pwede, kay kadto ra mang taga diha nga nabiktima unya naka-survive maoy gitaganaan sa mga hinabang, kanang nangabot nga wala magpuyo diri anhi man sad gud mangayo og ilang pagkaon," asoy pang Pacha.