Si Justo Sanico,74, kinsa gikahinabi sa Banat News mitug-an nga dili na siya gustong mobalik og puyo sa maong lugar gumikan sa peligrong mahugnoan pag-usab, namatay ang duha ka anak ni Sanico niadtong tungura nga pulos duna nay pamilya lakip ang ilang mga anak.
Si Sanico ug igsuon niining si Regino,76, kasamtangang nangahoy niadtong tungura dihang nahitabo ang pagkalusno sa maong bukid ngadto sa ilang barangay. Diha nalang nila nahibaw-i sa evacuation centers nga natabunan ang iyang mga anak ug mga apo.
Matud pa niya nga wad-on na sa mapa ang Guinsaogon maong dili na siya mobalik og puyo sa maong lugar ug kahadlok usab nga mausab ang insidente.
Samtang usa sa mga biktima mao si Ireneo Baslot nga gikahinabi sa Banat News mitug-an nga bisan walay namatay sa iyang pamilya dili na siya mobalik og puyo sa maong dapit bisan pugson.
Kini human ang iyang balay diin ang iyang tulo ka anak ug silang managtiayon gitapsingan naghaguros nga lapok padulong sa kabalayan sa iyang mga silingan sa duha lang ka dupa ang gilay-on.
Matud pa niya nga gumikan sa kakusog naguba ang ilang balay dili sa pagbangga sa lapok kundili sa mga nalagpot nga mga bato ug yuta diha sa ilang bungbong, niadtong tungura matud pa niya nga nangandam na siya nga mag-unong bisan mamatay basta kauban ang iyang asawa ug mga anak.
"Gikan ko sa basakan, pag-abot nako sa balay niuyog ang among balay, murag nilinog ba, pagtan-aw nako nahugmak ang bukid wala nako kalihok kay naa man akong pamilya, ako ato mag-unong nalang man mi kay ulahi naman, unya nitipas man ang lapok" sumala pang Baslot.
Sa pagkakaron gipangandaman na ni Mayor Maria Lim ang pagpahimutang sa mga survivors kung asa sila ibalhin og puyo, samtang si airline magnate Lucio Tan kinsa mibisita sa Saint Bernard misaad nga mohatag og tagsa ka libong salapi matag usa sa mga biktima.
Kagahapon duna nay 72 ka mga patay ang nakuha gikan pa sa unang adlaw hangtud ning pagsulat sa balita apan sa opisyal na nga talaan sa missing mikabat na og 1362 ka tawo, sukwahi sa naunang 900 kapin gumikan kay dunay wala maapil og lista.
Kagahapon usab pipila sa mga tawo ang nireklamo sa pagpalubong sa mass grave sa mga biktimang napalgan gumikan kay wala mananghid sa mga kabanay ang mga gitahasan niini, dugang pa niini mao ang kapakyas sa mga opisyal nga kuhaan og mga finger prints ang mga biktima una pa ilubong.
Hinungdan nga gipauktaba una ang mosunod untang batch nga ilubong gumikan kay pakuhaan pa kini og fingerprints aron masubay kung si kinsa kining mga napalgang tawo.