Inabagan sa kagamhanan sa dakbayan sa Sugbo ang "Tabang Southern Leyte" gihugopan sa mga Sugbuanon pagbubo og hinabang gikan sa alas 8:00 sa buntag hangtod sa alas 5:00 sa hapon.
Si Bise Mayor Michael Rama kinsa mitambong sa pagbukas sa maong programa sa Fuente Osmeña miingon nga way laing mahinungdanong ikatabang nato sa mga biktima sa pagdahili sa yuta didto sa Guinsaogon, St. Bernard, gawas sa mga pag-ampo, pagkaon, mga senina, tambal ug uban pa.
Apan higpit nga giawhag ni Rama nga kadtong wala na kinahanglanang hinabang, dili nalang ilakip sa mga donors.
Ang Tabang Southern Leyte nga programa gitambayayongan sa tanang estasyonan sa radyo nga AM ug FM dinhi sa dakbayan sa Sugbo.
Si Edward Abad, presidente sa KBP Cebu Chapter nagkanayon nga dako kaayo og mahimo ang tabang nga itunol sa mga kaigsoonan nato ngadto sa mga biktima sa maong katalagman.
Maoy hinungdan nga gilusad ang hiniusang brodkast sa tanang radyo sa Sugbo aron labing modaghan ang makatabang ug ang mahipos nga mga hinabang.
Si Leo Lastimosa nga maoy Vice Chairman sa KBP sa Sugbo nagkanayon usab nga bisan kon usa ra ka adlaw ang hiniusang radiothon apan matag sibyaanan magpadayon matag adlaw sa ilang pagdawat og mga hinabang gikan sa katawhan hangtod nga maulian ang dakong kadaot sa mga nahiagoman sa taga Guinsaogon nga katalagman.
Gawas sa mga ordinaryong molupyo, gihagit usab sa mga magsisibya ang mga dagkong negosyante pagpadayag sa ilang kasibot paghatag og hinabang ngadto sa mga taga Southern Leyte.