Ang drayber nga si Bienvenido Aballe, 34-anyos, lumad nga taga lungsod sa Bogo ug kasamtangan nga nagpuyo sa barangay Lahug dinhi sa dakbayan sa Sugbo, miuli sa usa ka Samsung D600 nga adunay kamera sa opisina sa DyDD-El Nuevo Bantay Radyo pinaagi ni Konsehal Emie Mates Gabito kagahapon sa buntag.
Matud pang Aballe nga usa ka pasahero ang misakay sa iyang gimanihong RP Corominas Taxi nga adunay plaka GWP-362 niadtong Domingo sa buntag ug nakalimtan ang cellphone niini sa luyong bahin sa taxi diin kini naglingkod. Iyang nabantayan sa dihang nanglimpyo siya sa taxi ang maong cellular phone hinungdan nga iya dayong gisuwayan og tawag ang mga numero nga anaa sa phonebook apan nahutdan na kini sa battery.
Midugang si Aballe nga ang iyang konsensya maoy nagtukmod kaniya sa pag-uli sa maong butang ngadto sa DyDD bisan pa man ug mahimo kini niyang ibaligya ngadto sa laing tawo aron siya makakwarta tungod sa kalisod sa panginabuhi karon panahona ilabi na kay nasayod siya nga dako og kantidad ang maong butang.
Si Gabito maoy mitawag sa tag-iya niini nga si Jacquilen Pedotti usa ka tinun-an sa grade six sa Collegio de Immaculada Concepcion, hinungdan nga nauli gilayon ang maong butang.