Girekomendar sa hepe sa Cebu Police Provincial Office, Sr. Supt. Vicente Loot, ngadto sa Police Regional Office 7 nga hatagan og Wounded Personnel Medal ug Medalya og Kagitingan ang mga biktima.
Ang mga sakop sa Special Weapons and Tactics sa kapolisan sa dakbayan sa Lapu-Lapu nga sila si PO3 Frederick Islit, PO2 Jomar Ybañez ug PO2 Roberto Pepito ang nangaangol sa ilang operasyon sa barangay Mactan nga niresulta usab sa pagkamatay sa usa ka suspek.
Ang napatay atol sa hitabo mao si Roberto Auxtero Baring samtang nakaeskapo mao si Diego Oyao kinsa duna nay warrant of arrest sa kaso sa ilegal nga drugas.
Giangkon ni Loot nga may problema ang lugar diin nahitabo ang ingkwentro sama sa kalisud sa agianan ug gipaabot usab nga mosukol gyud ang mga dakponon.
Nasayod usab ang kapolisan nga armado ang mga dakponon ug ilang giseguro nga walay sibilyan nga maapil kun unsa man ang mahitabo.
Hinuon sumala pa ni Loot nga ang PRO-7 mao ang moabaga sa gastuhanan sa tambalanan sa mga polis nga naangol.
Giklaro ni Loot nga dili makapaluya sa ilang kampanya batok sa ilegal nga drugas ang maong hitabo ug ila pa gyud pangitaon si Oyao aron dili kini makapadako sa iyang negosyo sa Sugbo.
Gawas sa dakbayan sa Lapu-Lapu, lakip sa gihingusgan sa CPPO ang kampanya batok sa ilegal nga drugas sa tibuok lalawigan sa Sugbo.