Nahitabo kini alas 8:45 ang takna sa miaging Martes sa gabii atol gayod sa pagsaulog sa Valentines Day diha sa Mactan Proper, siyudad sa Lapu-Lapu nga gibanabanang 40 ngadto sa 50 metros ang gilay-on gikan sa panimalay ni Mayor Arturo Radaza.
Ang namatay mao si Roberto Baring Auxtero, hingkod ang panuigon, ulitawo ug ig-agaw ni Francisco Oyao alyas Diego Oyao sa maong dapit nga maoy target sa buy bust operation nga gipahigayon kinsa nakaikyas.
Ang naangol sa pagpamusil ug panglabay og granada mao sila si PO2 Jomar Ybanez, PO2 Roberto Pepito ug PO3 Fredirick Eslit nga mga sakop sa raiding team nga gipangulohan ni Senior Inspector Francisco Baguio sa operation section.
Si Auxtero nga diha sa sulod sa panimalay ni Diego Oyao atol sa operasyon sa kapolisan ang napusilan sa mga polis dihang mibawos sila si PO2 Ybañez ug mga kauban dihang giunhan sila sa pagpamusil nga gisundan pa gayod sa paglabay og duha ka granada.
Hinuon wala makaboto ang ikaduhang granada sanglit duha ang pin niini ug usa lang ang naibot sa suspetsado dihang gilabay kini ngadto sa mga polis.
Si PO3 Eslit maoy grabe gyod nga naangol apan luwas na hinuon sa kakuyaw nga giatiman sa mga doktor sa Mactan Doctor Hospital ug padayon kining giatiman sa mga doktor.
Si Diego Oyao ang igsoon ni Bo Oyao nga nalakip sa watchlist sa mga druglord sa Sugbo nga gibutyag kaniadto ni Kongresista Antonio Cuenco sa hawanan sa kongreso nga nadakpan usab sa kapolisan sa maong siyudad pipila na ka tuig ang nakalabay.
Si Senior Superintendent Louie Oppus, hepe sa nahisgotang kuwerpo ang namahayag nga iyang gimando kang Senior Inspector Francisco Baguio ang pagpatubag sa gikataho nga kusog ang pagpayuhot og shabu sanglit may mga kalingawan nga gihimo isip kabahin sa umaabot nga tinuig niining pangilin.
Dugang pa ni Oppus nga gipadala sa maong dapit ang dugang pa gayod nga mga polis dihang si Senior Inspector Baguio ang nangayo usab og dugang back up.
Si Cebu Provincial Director Vicente Loot nga nakadawat sa maong alarma ang dali usab nga nakapadala og dugang nga mga polis apan si Oyao ang nagmalampuson gayod sa pag-ikyas.
Si SPO1 Honorato Tano nga gikahinabi sa Banat News ang miingon nga sa dapit nga nahagbaan sa patay'ng lawas ni Auxtero ang kalibre 45 nga may buhing bala, kalibre 38 nga ilang gituohang maoy hinagiban sa namatay uban usab niini sa gilabay nga granada, mga pakete sa shabu ug mga kahimanan sa paggamit niini.
Dugang pa ni SPO1 Tano nga atol sa maong operasyon nga ilang nadakpan usab sa akto ang tulo ka minor de edad nga naghingus og shabu sa sulod sa kubol-kubol nga gipanag-iya sa nakaikyas nga suspetsado.
Matud pa ni Tano nga ang tulo pasakaan nila og kaso nga kalapasan sa Republic Act 9165 kun Comprehensive Dangerous Drug Act of 2002.