Ang mga gireklamo ni Leah Rondez mao sila si Faelnar, Atty. Sisenio Andales ug Atty. Fortunato Parawan, Lorenzo Basamot, Daido Abcede, Michael Ocleasa, Michael Ralota, Nemesio Pagador, Licerio Jaca, Nilo Tariman, Jerry Guardo, ABC executive Secretary Tesa Cang ug kanhi Civil Service Commissioner director Tomas Ramos.
Matud pa nga dunay marathon hearing nga gikatakdang paminawon diha sa Sandiganbayan Branch 4 karong Marso 29, 30 ug 31.
"We want the Sandiganbayan to resolve this case so that we will enjoy our summer vacation and free from any hassles," sumala pang Faelnar kinsa mibutyag nga tambungan kini sa hunta direktiba atol sa hearing.
Si Rondez maoy gitudlong barangay project engineer sukad niadtong Septembre hangtud Disyembre 31,2002 panahon pa ni kanhi ABC president Jose Navarro. Giingong ang appointment mahimong ma-renew matag unom ka bulan ug giaprubahan kini ni kanhi mayor Alvin Garcia ug napahibalo kini ngadto sa CSC. Apan si Rondez gi-terminate dihang duna nay natudlong bag-ong board of directors.
Sayo pa sa pagtumaw sa isyu ang mga opisyal sa ABC nagkanayon nga ang pagtaktak kang Rondez dili matawag nga grave abuse of authority, oppression and grave misconduct gumikan kay isip bag-ong mga opisyal sa ABC duna gyud silay katungod nga makapili kun si kinsay ilang mahimong staff.
Usa sa mga gireklamo ni Rondez mao ang wala paghatag sa iyang terminal leave pay ug uban pang benepisyo human sa giingong iligal nga pagtaktak kaniya.
Kahinumduman niadtong 2004 ang Ombudsman -Visayas mipasuspenso'g unom ka bulan sa tibuok ABC board, apan ang Court of Appeals mipagawas og injunction batok niini human gikwestiyon sa board ang awtoridad sa anti-graft office nga makahatag og final ug executory penalties.
Matud pa ni Faelnar nga ang isyu sa termination ni Rondez naresolba na sa korte diin giingong ang board dili mahimong sad-an gumikan kay si Rondez dili usa ka kawani sa gobiyerno.
Ang umaabot nga hearing matud pa ni Faelnar may kalambigitan sa giingong laing pasangil ni Rondez batok sa board kabahin sa wala paghatag sa P4,300 nga re-imbursement sa krudo nga gigamit sa sakyanan sa ABC technical staff una pa siya taktaka sa kasamtangang mga board.