Polis gikulata sa Swiss

Natingkagol sa Bantayan District Jail ang usa ka Swiss national human kini mangulata og polis kinsa usa sa miresponde sa reklamo sa tag-iya sa tindahan nga iyang giimnan tungod kay wala kini mobayad sa iyang giinom niadtong Huwebes sa gabii diha sa Barangay Talisay, lungsod sa Santa Fe.

Gisikop ni SPO1 Alberto Juban ug SPO1 Wainright Desabille si Niclaus Wildi, 40-anyos, temporaryong nagpuyo sa Santa Fe Beach Club sa maong lugar.

Base sa imbestigasyon sa kapolisan sa Santa Fe, si Widli mi- order og duha ka botelyang beer diha sa tindahan nga gipanag-iya ni Nieva Cababan apan wala kini mobayad.

Si Juban naigo sa kulata ni Wildi dihang iya kining giimbistigar kabahin sa reklamo ni Cababan.

Si Wildi gireklamo usab sa tigdumala sa Santa Fe Beach Club tungod kay wala kini mobayad sa iyang bill nga P8 mil sa iyang pagpuyo sa maong resort.

Si SPO1 Renato Illut nagkanayon nga dili lang kadto maoy unang higayon nga mibuhat si Wildi og kasamok sa lugar diin magmaoy kini kun mahubog.

Matud ni Illut nga si Wildi natingkagol sa prisohan tungod sa iyang pagkulata ni Juban ug dili sa wala niini pagbayad sa iyang bill.