Epekto sa 2% RVAT susihon

Mopahigayon og subsob nga monitoring ang kagamhanan sa dakbayan sa Sugbo niadtong mga negosyante nga mopahimulos sa higayon og magpataka lang og pa-umento sa ilang mga baligya nga produkto ilabi na atol sa pormal nga pagpatuman unya sa dugang dos porsiyento sa Reformed Value Added Tax (RVAT) sugod karong bulana.

Sentro sa monitoron sa mga opisyal sa dakbayan sa Sugbo mao ang mga namaligya sa mga nag-unang palaliton sa mga kamerkadohan dinhi sa dakbayan sama diha sa Carbon Area, Tabo-an Public Market ug uban pa.

Hinuon giklaro sa mayor nga pabor siya sa pagpatuman sa dugang dos porsiyento nga RVAT gumikan kay makatabang kini sa gobyerno aron palig-onon ang serbisyo ngadto sa publiko pinaagi sa pagpatuman og mga mehoras.

Nagkanayon ang mayor nga ang mga adunahan maoy maapektohan sa pagpatuman ning dugang dos porsyento sa RVAT gumikan kay mao man kini kusog mamalit og mga lain-laing produkto.

Nasayran nga mag-agad sa gidaghanon sa mga pamalitong produkto ilabi na kadtong covered sa RVAT ang gidak-on sa mabayran nga buhis.

Hinuon ang mga militanteng pundok sa laing bahin nagplano nga molusad og halapad nga lihok protesta karong bulana aron supakon ang gitakdang implimentasyon sa RVAT.

Ang mga militanteng pundok nga nagplano nga molusad og protesta gilangkoban sa Bayan Muna, Anak Pawis, Gabriela ug mga Transport Group sama sa NADSU ug pundok sa mamumuo ang AMA-Sugbo-KMU.