Si Roger Singh, 42, midangop nalang sa buhatan sa Pardo Police Station ug misumbong nga duha ka wala mailhing lalaking luwan sa usa ka XRM nga motorsiklo ang pugsanong mikuha sa iyang gisuksok nga binandol nga kwarta samtang siya nakig-istoryahay sa usa sa iyang mga kustomer.
Si SPO4 Jaime Repompo sa pakighinabi sa Banat News nagkanayon nga miabot ang mga suspek diha sa luyong bahin sa biktima ug ang backrider niini maoy mikanaog ug miduol sa luyo sa biktima.
Matud pa nga ang kwartang diha giluklok ni Singh sa luyong bulsa gikuot sa suspek ug yanong milakaw balik sa iyang motor diin nagpaabot ang kauban niini.
Dihang gisuwayan og duol ni Singh aron bawion ang binandol nga kwarta kalit nga mibunot og armas ang driver nga nagpaabot ug gition ngadto sa biktima hinungdan nga mikaratel og dagan si Singh sa kahadlok nga pusilon.
Wala pa matino sa kapolisan kun pila ang kantidad niadtong gibandol nga kwarta, matud pa nga gikan pa naningil si Singh sa iyang gipautangan niadtong higayuna.
Niadtong milabay'ng Sabado usa ka paisano ni Singh nga si Ricky Singh, 35, nga taga Springville sa lungsod sa Minglanilla ang gipatay sa mga tulisan diha sa sudlonong bahin sa Sitio Vampire barangay Duljo-Fatima.
Duna nay tulo ka gidudahang suspek ang kapolisan sanglit mga molupyo ra usab sa maong barangay ang tulo kinsa padayon pa karong gipangita.