Miliki ang ulo sa biktimang si Antonio Mascariñas, gibana-banang 30 anyos ang panuigon ug molupyo diha sa dalan Mc Arthur Boulevard ning dakbayan kinsa gihulagway nga nagkadeperensya ang pangisip.
Sumala pa ni SPO2 Alex Dacua sa Banat News daan nang nagpakita og senyales nga maghikog ang biktima niadto pang nakalabay'ng adlaw dihang nakit-an kini sa mga igsuon nga nanguha og mga pisi, wire ug uban pang ilang gituohang posibleng maoy iyang gamiton sa paghikog.
Nunot niini, ang igsuon sa biktima nga si Jimmy maoy gitahasan sa pagbantay kaniya sukad pa sa milabay'ng gabii aron dili kini makahigayon sa paghikog. Apan kagahapon sa alas 6 sa buntag nalipat si Jimmy.
"Gipilo kuno ang karsones (sidsid) dayong dagan layat sa bintana, wala na lagi kuno makabantay ni si Jimmy kay tibuok gabiing walay tulog sa pagbantay Antonio," asoy pang Dacua.
Nasuta sa mga imbestigador gikan sa mga kabanay niini nga nadaut ang pangisip niini gumikan sa pag-inom nga walay kaon kaniadto.
Dugang pa ni Dacua nga gitug-anan siya sa mga kabanay nga makadaghan na kining misuway sa paghikog pinaagi sa pag-ambak sa usa ka building apan kanunay nga mabantayan ug masanta.