Kini aron walay mahitabong katahap sa unang imbestigasyon hinungdan nga dunay gipahigayong independent nga imbestigasyon diin ang mga neutral team ang mopahigayon niini ug gilauman nga mahuman ang nahisgutang imbestigasyon karong Biyernes niining semanaha.
Ang DOE Central office ug Visayas field office maoy mipahigayon sa unang imbestigasyon.
Gitataw ni DOE undersecretary Guillermo Balce nga alang sa neutral ug walay bias nga imbestigasyon ang grupo nga gilangkuban sa mga representante sa Safety and Health Association of the Philippines Energy Sector, Mines and Geo-science and Bureau sa Department of Environment and Natural Resources (DENR) ug ang Central office ug Visayas office sa DOE.
Gibutyag ni Balce nga gilauman sa DOE nga magpadayon ang operasyon sa minahan sa Ibalong tungod kay ang pagmina maoy usa sa panginabuhian sa mga residente sa lugar.
Matud ni Balce nga ang DOE miawhag nga pabayaran sa tigdumala sa Ibalong Mining Company ang mga pamilya sa biktima.
Si Balce nagkanayon nga human sa resulta sa imbestigasyon karon sa fact finding team mopahigayon sila og dayalogo uban sa local officials sa lungsod sa Dalaguete una sila moluwat sa ilang pinal nga desisyon kabahin sa Ibalong.
Si Balce midungag nga kun dunay kalapasan nga nabuhat ang Ibalong pahamtangan kini og silot base sa balaod.