Mao ning gisulti ni Pedro Pantaleon Reyes, usa ka reporter sa usa ka travel publication didto sa Mexico, kinsa naatlan sa Fiesta Señor dinhi sa Sugbo.
Si Ginong Reyes atong gipangutana unsay iyang ikasulti sa Santo Niño solemn procession niadtong Sabado ug mao toy iyang gitubag.
Suma pang Reyes 20 anyos na siya sa travel reporting ug wala pa siya makakita'g prosesyon nga ingon adto kadako "in terms of the number of faithful here in Asia." Ug matud niya daghan na siyang nakoberan nga fiesta.
Matud niya mas daku pa kaayo ang Cebu Santo Niño procession kay sa ilahang Nuestra Señora de Guadalupe procession sa dakbayan sa Mexico.
Nakakita usab siya sa Black Nazarene procession didto sa Quiapo, Manila, ug matud niya layo ra kaayo kadto sa gidak-on sa Fiesta Senior procession nga iyang nasaksihan adtong miaging Sabado.
Duna sad kuno siya'y makitang mga procession sa Germany, Spain, Italy ug Portugal ug ang iyang nakit-an sa Italy mao ray sa iyang huna-huna makalupig sa Santo Niño procession dinhi sa Sugbo.