Magtiayon nanagan biniyaan ang marijuana ug motorsiklo

Napakyas sa pagsikop ang kapolisan sa Talisay sa magtiayong gikatahapang tigpamaligya og marijuana tungod kay kalit nanagan palayo ug gibiyaan ang 66 ka linikit nga marijuana ug usa ka gamayng bundle nga pinaugang dahon sa maong tanom nga gisulod sa usa ka plastik niadtong Domingo sa gabii duol sa tulay sa Mananga Barangay Tabunok dakbayan sa Talisay.

Ang kapolisan sa Talisay pinangulohan ni SPO3 Danilo Jimeno mipahigayon og patrolya sa maong lugar ug gisita sa kauban niining si PO2 Rico Emperwa ang lalaki tungod kay nagbarogbarog kini kauban ang asawa kilid sa usa ka motorsiklo nga kolor blue nga walay numero ang plaka.

Si RolandoTabasa, 29-anyos, taga Barangay Don Andres Soriano, dakbayan sa Toledo, matud ni Emperwa nga miparada uban sa asawa diha sa maong lugar hinungdan nga iya kining giduol. Nangangkon ang lalaki nga maoy tag-iya sa motorsiklo nga walay plaka.

Gipangayoan ni Emperwa og dokumento sa maong motorsiklo si Tabasa pagmatuod sa pagpanag-iya niini. Gitunol sa suspetsado ngadto sa maong polis ang iyang driver's license, Operator's Receipt (OR) ug Certificate of Registration (CR).

Apan dihang gibasa ni Emperwa ang maong nga dokumento kalit nga midagan si Tabasa ug ang asawa niini paingon diha sa ubos sa tulay sa Mananga ug gibiyaan ang nahisgutang mga pinaugang dahon sa marijuana lakip na ang motorsiklo. Ang motorsiklo gi-impound karon sa mga polis.

Si Emperwa midungag nga gigukod nila si Tabasa ug ang asawa niini apan wala na nila kini makit-i tungod sa kangitngit sa nahisgutang lugar.