"Atraso" mikalas og usa

Atrasong gisingil mikalas og usa samtang miangol usab sa usa ka opisyal sa Barangay Youth sa Busay human gipamusil sa gituohang gikaatraso sa mga biktima diha sa Nivell Hills, barangay Busay ning dakbayan.

Ang namatay giilang si Alvin Arengque, 21, ulitawo molupyo sa nahisgutang dapit kinsa nakaangkon og duha ka samad pinusilan diha sa iyang dughan ug naangol usab ang barangay youth president nga si Nestor Surban, 22 dihang hasta kini gipusil diha sa dughan duha ka higayon.

Sumala pa ni SPO2 Alex Dacua sa Homicide Section kasamtangang nakig-inom ang mga biktima sa ilang higalang si Robby Galarion dihang kalit nga nangabot ang mga suspek.

Wala na makaporma ang mga biktima dihang kalit gipamusil sa mga suspek dayong daling nanagan pagawas luwan sa usa ka taxi padulong sa direksyon sa Sitio Plaza base usab sa gibutyag sa mga nakakita.

"Grudge siguro ni, kay sigun pa sa mga tawo didto kadtong namatay nakakita kuno to og trouble previously sa Sitio Plaza, siguro ni-resbak tong mga nakaaway niya," asoy pang Dacua sa Banat News.

Daling gidala ang mga biktima sa tambalanan apan gideklarar nga dead on arrival si Arengque gumikan sa grabeng igo niini.