Matud pa ni Loot nga gawas kaniya, duna pay laing lima ka susama niya og ranggo nga Superintendent sa Sugbo nga aprobado na usab ang ilang promosyon.
Usa na niini ang iyang deputy director for administration sa CPPO nga si Supt. Agustin Lloveras.
Hinuon sumala pa ni Loot nga gikan sa Malacañan, manaug pa kini ngadto sa National Police Commission, dayun sa Kampo Crame.
Ang Kampo Crame mao na ang mopagawas sa general order aron mahingpit na ang ilang promosyon.
Giaprobahan sa Malacañan ang promosyon niadtong Disyembre 27 ug nagpaabot si Loot nga moepekto ang general order sa Kampo Crame karong Enero 27.
Nunot niini, nagtoo si Loot nga dunay kausaban sa ilang buhatan sa umaabot nga mga adlaw sama sa pag-destino sa bag-ong mga Senior Superintendent sa ubang probinsiya ug syudad.
Apan sa iyang bahin, si Loot nalipay sanglit makompleto na ang iyang requirements sa pagka hepe sa lalawigan sa Sugbo.
Nasayran nga nakadawat og pagsaway si Loot nga gipugos ni Gobernador Gwendolyn Garcia sa pagbutang sa pwesto bisan dili pa haum ang iyang ranggo sa iyang katungdanan.
Apan giklaro ni Loot nga bisan wala pa ang iyang promosyon, kompiyansa na siya nga makapakita sa iyang abilidad sa pagdumala sa CPPO.