Si Associated Labor Union (ALU) information officer Joy Lim sa pakighinabi sa Banat News nagkanayon nga gikalipay nila ang lakang nga gihimo ni Arroyo para sa mga mamumuo.
Sumala pa ni Lim nga usa kini sa mga demandang ilang gipangayo sa gobiyerno kaniadto pa gumikan sa grabeng krisis karon, matud pa ni Lim nga kun mapatuman na kini imbes nga mobayad sa buhis ang mamumuo madala na nila kini sa ilang mga pamilya.
Si Arroyo mipahibalo niadtong milabay'ng adlaw nga dili na pakolektahan og withholding tax sugod karong Enero 2006 ang mga pribado ug publikong mga kawani nga nagdawat lang og minimum wage.
"Mao ni ang usa sa mga butang nga atong gipangayo sa iyaha (Arroyo), at least mas dako-dako pa ang ma-take home sa mga kawani gikan sa ilang sweldo," asoy pang Lim kinsa mipadayag nga mas malipay pa gyud unta kun hasta ang gipangayo nilang "wage compliance" alang sa tanang mga kawani gihatag pa.
Ang Provincial Chairman sa Alliance of Progressive Labor nga si Joe Tomongha mitug-an sa Banat News nga ila gihapong gihangop ang gihimo ni Arroyo karon apan panid-an pa nila ang limitasyon niini.
Sama sa pamahayag ni Lim, si Tomongha mipadayag nga angayan na gyung hatagan ang tanang mga kawani og "minimum wage" gumikan sa krisis karon.
Nunot niini ang grupo sa mga mamumuo subling nanawagan sa Department of Labor and Employment nga higpit nga pasundon ang mga kompanya sa pagsuhol sa minimum wage.
Si Tomongha nagkanayon nga kun dili man gani makatuman ang mga kompanya sa "minimum wage" iyang giawhag nga pasumitiron og "black and white" nga pamahayag aron pagmatuod nga dili gyud sila makakaya og hatag niini.
Samtang si Lim sa iyang bahin nagkanayon nga walay kompanyang dili makahatag sa minimum gumikan kay gihimuan kini og lawom nga pagtuon sa Regional Tripartite Board diin usa sa mga representante mao ang business sector.
Matud pa ni Lim nga kun mahatag bisan ang hustong suhulan sa mamumuo nga iyang gihulagway nga labing ubos nga sweldo(minimum) mosaka og dyutay sa "poverty level" ang mga mamumuo.
Ang ALU dunay 250,000 ka mga miyembro nga nasakop sa "formal sector" kun kadtong mga kawaning nagtrabaho sa mga kompanya nga dunay Collective Bargaining Agreement nga gipatuman.