Kini subay usab sa gipahibalo ni Konsehal Gerardo Carillo, tsirman sa committee on social services ug action officer sa task force niadtong milabay'ng semana nga ila nang hiposon ang mga makililimos sa mga kadalanan nga magpakilimos niadtong mga pasahero sa mga jeep pasaheroan ug diha sa Colon Area.
Tumong ug tuyo niini aron malikay ang maong mga makililimos sa peligro sa ilang mga kinabuhi diha sa kadalanan.
Sa tibuok adlaw nga operasyon sa task force kagahapon sa Colon, P. del Rosario ug ubang bahin sa dakbayan mokabat sa 20 ka mga makililimos nga hingkod na ang panuigon ang ilang nahipos ug 16 ang mga minor de edad.
Ang maong mga makililimos kasamtangan kining gipahiluna diha sa Pari-an Drop- in Center kagahapong adlawa.
Una nang gipadayag sa konsehal nga tinud-on na nila ang pagpasaka og kaso batok niadtong mga makililimos nga masakpan nga magpadayon sa maong buhat diha sa mga kadalanan dinhi sa dakbayan subay sa ordinansa sa siyudad.
Gipatuman ang maong laraw human nakita nga mi-anam-anam na usab karon og kadaghan ang mga makililimos sa mga kadalanan ning dakbayan ilabi na niining nagsingabot na ang Pasko.
Gani dunay ubang mga minor de edad ang makita diha sa dalan P. del Rosario corner Osmeña Boulevard ang magpatuo nga manaygon ngadto sa mga pasahero sa mga jeep pasaheroan.
Nasayran nga kaniadto ra nga gihingusgan sa mga opisyal sa City Hall ang pagsumpo ning mga tawong magpakilimos sa kadalanan dinhi sa siyudad apan hangtud karun pabilin kining wala masumpo gumikan kay human kini kabuhi-i mobalik man gihapon sa mao nilang buhat.