Namaligya pekeng bulawan nadakpan

Nagbaligya og mini nga binaretang bulawan ngadto sa Japanese national ang nadakpan sa kapolisan sa entrapment operation. Ang entrapment operation sa kapolisan sa barangay Day-as sa lungsod sa Cordova natigayon human usab masuta sa biktima nga peke ang giingong binaritang bulawan nga gibaligya sa suspetsado.

Ang suspetsado mao si Marvin Parawan Cortes, 41 anyos, minyo nga nagpuyo sa Cambaro, Mandaue nadakpan nga mitunol og laing mini nga gold bar ngadto sa biktima.

Ang biktima mao si Masayuki Kitche, hingkod ang panuigon, minyo ug lumad nga taga Tokyo, Japan.

Si PO3 Rolando Tagsip sa kapolisan sa nahisgotang lungsod nga gikahinabi sa Banat News ang miingon nga unang nakahatag og P20 mil ang biktima ngadto sa suspetsado.

Dugang pa niya nga si Cristina Aytuna Kitche, Pilipina ug asawa sa biktima midala sa gipalit nilang gold bar sa usa ka pawnshop ug ilang gipasusi ug nahibaw-an nga mini kini.

Matud pa ni PO3 Tagsip nga kuyog ni Cristina ang biktima nga mitaho sa ilang buhatan diin gihimo gilayon ang entrapment operation ug nadakpan ang suspetsado ug laing gold bar na usab ang dala niini.