Giila sa kapolisan ang biktima mao si Gregoria Silvano, minyo ug molupyo sa Sitio Sawang, Barangay Poblacion sa nahisgutang barangay kinsa nanag-iya og kan-anan nga dunay videokehan diha sa maong merkado.
Si Inspector Rodrigo Orbigozo, hepe sa Badian Police station sa pakighinabi sa Banat News mitug-an base sa gibutyag sa pag-umangkon sa biktima, nagdali-daling misulod si Silvano diha sa iyang tindahan bisan nagdilaab na ang mga stalls sa palibot.
Giingong buot nga makuha sa biktima ang gitipigang kuwarta diha sa tindahan sa kahadlok nga malamoy og apil sa sunog, apan giingong wala na makabalik og gawas ang biktima.
Nagtuo sila nga nakalusot sa laing agianan si Silvano apan dihang gisubay na ang naugdaw nga merkado diha na napalgi sa sulod sa kasilyas ang biktima nga nagsipit pa sa bulsita sa mga binandol nga kwarta ug mga alahas.
Sumala pa ni Orbigozo posibleng na- suffocate (nahilo) sa aso ang biktima diha sa kasilyas sa pagtuong dili maapil ang kasilyas gumikan kay dunay tubig apan namatay gihapon kini.
Wala pa matino sa kapolisan sa Badian kun diin magsugod ang kalayo, nasayran nga dunay firetruck ang Badian apan walay mga bombero nga nag-operate niini.
Si Orbigozo miingon nga nasubhan sa maong sunog ang ilang mini firetruck nga bag-ohay lang nadawat gikan kang Gobernador Gwendolyn Garcia ning tuiga apan kini mao usab ang labing unang higayon nga miatraka ang mga polis sa maong lungsod sa susamang alarma isip mga bombero.
Sumala pa ni Orbigozo nga upat ka mga sakop niya ang mimaniobra paggamit sa maong firetruck subay usab sa ilang nakat-unan dihang gibansay sila paggamit niini. Apan gumikan kay ginama sa mga gaay ang mga stalls wala mapawong ang kalayo. Dugang pa niana gamay kaayo ang tangke sa ilang firetruck ug layo usab ang kuhaanan sa tubig.
Diha na lang kini napalong dihang nangabot na ang mga bombero gikan sa Moalboal, Malabuyoc, Barili ug Dumanjug.
"Na-contain naman unta to primero pero kay gamay man ang atong firetruck nahutdan og tubig nangita nasad mi, hangtud ingon adto ang sitwasyon atras sige hakot tubig sa layo kay wala man mi fire hydrant," asoy pang Orbigozo.
Napawong hinuon ang kalayo sulod sa usa ka oras ug midanyos og P1.5 milyon gumikan sa mga baligya.