Nahitabo ang pagpamusil alas 5 pasado ang takna sa hapon niadtong miaging Domingo sa sitio Timpolok sa barangay Babag, siyudad sa Lapu-Lapu.
Ang biktima giila nga mao si Marlon Fernan, 20 anyos, ulitawo, nga lumad nga taga lungsod sa Bogo ug factory worker sa usa ka establisamento sa maong dapit.
Sa nahibaw-an sa Banat News kang SPO2 Rolito Jumao-as sa Homicide Section sa kapolisan sa maong dakbayan nga naglakaw lang ang biktima paingon sa panimalay sa iyang higala.
Ang wala mailhing mga mamumuno kalit lang nga mitumaw sa maong lugar nga nagsakay og motorsiklo ug gipamusil ang biktima dayong sibat pahilayo.
Dali nga gidala ang biktima sa Mactan Doctors Hospital nga nahimutang sa maong dakbayan ug padayon kining giatiman sa mga doktor sa maong tambalanan.