Gibutyag ni mayor Tomas Osmeña nga normal lang nga ilahang tabangan kadtong mga polis nga makasugat og kakuli-an sa higayun sa ilang duty ilabina og magtubag kini og mga alarma.
Kini sama sa pagpa-angay sa siyudad og abogado nga maoy maka-depensa sa maong mga polis sa kasong ilahang atubangon may kalambigitan sa ilang pagtuman sa trabaho.
Gipasabot sa mayor nga angayng tabangan ang maong mga polis nga makasugat og ingon niining suliran aron dili ma-discourage ang ubang mga polis ug magpanagana nalang hinoon pagtuman sa ilang gimbuhaton gumikansa umaabot nga masugatang kakulian.
Una nang gireklamo sa pamilya sa napatay nga suspetsadong tigpayuhot og drugas sa Barrio Luz nga si Dave Ezbra nga gi-salvage kini sa lima ka mga polis pinangulohan ni CIIB chief Paul Labra.
Apan daling gi-insister nila ni Labra ug mga kaubanan nga usa ka lihitimong operasyon ang ilang gihimo ug gani andam ang maong mga polis nga mopa-ubos sa paraffin test.
Gi-klaru ni Osmeña nga dili sa tanang higayun nga tabangan niya ang mga polis ilabina kon makahimo kini og mga buhat nga wala masubay sa hustong proseso.
Usa sa gitumbok ni Osmeña mao ang gi-atubang nga kasong murder ni SPO4 Juanito Pajantoy gumikan kay kombinsido ang mayor nga mao gyud kiniy nakapusil patay sa kauban niining polis nga si PO3 Michael Sarcol ug sa gigukod nilang suspetsadong tulisan niadtong tuig 2001.
Hinoon gitug-an sa mayor nga kapin sa P600 mil ang nahipos nga tabang sa siyudad nga gihatag ngadto sa pamilya ni Sarcol wala pay labot sa scholarship sa mga anak niini.