Sila si SPO2 Hermis Obiso sa Service Security Group sa Cebu Provincial Police Office ug SPO2 Ahmed Barquin sa Aloguinsan Police station gimandong paimbestigahan sa kampo Crame ngadto sa Police Regional Office 7.
Sa usaka migawas nga report sa DYAB dunay nadawat nga text messages ang Crame niadtong Nobiyembre kalabot sa pasangil nga ang duha maoy protektor sa nahisgutang ilegal nga kalihukan.
Gimanduan dayon sa PRO7 si Supt. Vicente Loot sa pagpaimbestigar sa duruha, nasayran nga ang duha managsilingan sa barangay Luray sa dakbayan sa Toledo. Si Obiso kanhi sakop sa 703rd Provincial Mobile Group samtang si Barquin kanhi warrant officer sa Toledo police ug nabalhin na sa Aloguinsan.
Si Obiso sa pakighinabi mihimakak sa pasangil ug miingong posibleng kaubang polis ra usab ang mibutang-butang kanila nga paryente usab sa managsuong mga Poloyapoy nga iladong mga drug pushers sa Toledo nga ilang gironda uban sa mga sakop sa Regional Investigation and Intelligence Division.
Samtang si Barquin sa iyang bahin nakugang sa balita apan nagdudang binuhatan kini sa mga tawong iyang gipanakop kaniadto nga buot makabalos, matud pa niya dili niya buhaton ang maong binuang gumikan kay respetadong magtutudlo ang iyang kapikas.