3 tulisan gipusil

Tulo ka armadong tawo napusilan sa usa ka polis sa dihang nasigpatan kini sa polis sa akto nga pagpanulis sa miaging hapon sa Pier 7, sa barangay Subangdako, siyudad sa Mandaue.

Gidala kini sa Vicente Sotto Memorial Medical Center sila si Leonardo Pepito, 27 anyos, ulitawo nga taga dalan Logarta sa siyudad sa Sugbo, Dick Napalo, 23 anyos, ulitawo, taga barangay Tisa ug Iluminado Parohinog, 25 anyos, ulitawo nga taga Pier Area sa dakbayan gihapon sa Sugbo.

Ang tulo pulos nakabaton og samad pinusilan sa ilang mga tiil dihang ilang gitulis si Clint Anthony Aballe, 24 anyos, ulitawo nga taga Canjulao, dakbayan sa Lapu-Lapu.