Ang maong polis giilang si PO3 Renato Prieto diha madestino sa maong kampo apan nagpuyo sa gikahitabuan, samtang ang napusilan sa polis mao si Edgar Perez, 31, ulitawo, molupyo sa maong lugar.
Si SPO1 Rodrigo Roble mitug-an sa Banat News base usab sa gihimong imbestigasyon ni SPO4 Jose Salingua Jr. nga giingong misuway og ilog ang biktima sa kalibre .45 pistola sa maong polis human sa panaglalis.
Sumala pa nga naabtan ni PO3 Prieto ang biktima uban sa laing mga silingan nga nanaghantak sa maong dapit maong iya kining gibadlong aron mangundang apan gikatahong si Perez maoy nagmagahi ug nakiglalis sa polis.
Nianang nagkainitay na giingong kalit nga giilog sa biktima ang armas ni Prieto hinungdan nga nahitabo ang panaglayog ug nianang tungora aksidenteng mibuto ang armas ug diha maigo makausa sa walang abaga ni Perez.
Gituohang naigo ang kasingkasing sa biktima hinungdan sa hinanali niining kamatayon. Si Prieto human sa insidente malinawong mitahan sa Danao City Police dala ang iyang armas.
Nakarekober ang mga polis og usa ka basiyo sa kalibre .45 diha sa maong lugar.
Si Supt. Vicente Loot sa unang pakighinabi sa Banat News sa naunang mga interview mibahad nga hutdon niya og tangtang ang iyang mga sakop nga badlungon dili lang ang pagpabalhin og laing dapit gumikan sa mga pagpakauwaw nga gihatag niini sa kinatibuk-ang organisasyon sa kapolisan.