NBI nangayo'g rekord sa city hall

Nangayo og kopya ang National Bureau of Investigation sa employment records sa tanang kawani sa City Hall nga nadestino sa business permit section isip kabahin sa nagpadayong imbistigasyon sa pagpalusot og mga mini nga business permit.

Gibutyag ni Atty. Renan Oliva, ang pangulo sa mga NBI agent nga gitugyanan pag-imbestigar sa anomaliya pagpalusot og pekeng business permit sa City Hall nga mipadala na sila og komunikasyon sa kadagkoan sa City Hall nga hatagan sila sa maong mga papeles.

Matud ni Oliva nga kabahin kini sa ilang imbestigasyon pagsuta sa employment records sa mga kawani sa business permit section, ilabi na kadtong mga gipangrelibohan na sa ilang mga puwesto ug gibalhin sa laing katungdanan.

Si mayor Tomas Osmeña misaad nga iya gyod nga ipapriso ang mga kawani sa City Hall nga responsable sa maong binuang, og mibulsa ra sa mga gibayad sa mga magbubuhis nga milukat og business permit.