Si Col. Jefferson Umandam ang tigpamaba sa Central Command sa pakighinabi sa Banat News mitug-an nga dili mga "combat troops" ang tulo ka mga namatay kundili mga "civic troops" nga mihimo og serbisyo sa paghatud og mga maayong balita kalabot sa mga programa sa gobiyerno diha sa kabukiran.
Sumala pa ni Umandam nga posibleng misagol pa ang mga rebeldeng nagtakubang mga sibilyan samtang nagpahigayon og "pulong-pulong" ang mga sundalo sa wala pa ang pagpangatake.
"Ang atong mga tropa didto nag-conduct og pulong-pulong unya kadtong mga rebelde nagtakuban sila under the guise nga sila mga sibilyan unya duna diay silay dautang tuyo, they (mga sundalo) are performing noble affairs for the nation building, nagpabilin gyud ang ilang(NPA) murderous minds," asoy pa ni Umandam.
Sumala pa sa Cebu Provincial Police Office ang mga napatay mao sila si Sgt. Rolando Luna, Corporal Bobby Licuno ug PFC Joseph Bingil, si Luna maoy gikatahong team leader sa maong tropa. Apan si Umandam wala mokumpirmar sa maong taho sanglit mas unahon pa sa AFP nga pahibaw-on ang mga kabanay sa mga napatay.
Samtang giklaro ni Umandam nga upat ka M16 armalite ug upat usab ka M14 assault rifles lamang ang nakuha uban sa wala matinong gidaghanon sa mga bala.
Giklaro usab ni Umandam ang migawas nga balitang mipahibalo pang daan ang mga rebelde sa mga sibilyan nga ilang atakihon ang kampo gumikan kay ang maong pahibalo matud pa niya gitug-an pila nalang ka segundos sa dayon ng pagsugod sa pag-atake.
Sa pagkakaron ang Central Command mipadala na og dugang tropa nga migukod sa mga rebelde sa sa palibot nga dapit, dugang pa niya nga ang Central Visayas front (Bohol ug Negros) nga gilangkuban sa gihiusang mga rebel fronts sa rehiyon maoy responsible sa pag-atake.