Amerikano gikulata kay pataka pamasangil

Bun-og nga midangop sa buhatan sa Theft and Robbery Section ang usa ka Amerikanong turista human kini gitabangan og kulata sa mga tawong nainit sa iyang pagpataka og pasangil nga maoy mikawat sa iyang cellphone sa usa ka imnanan sa sitio Maaslum barangay Busay ning dakbayan kagahapon sa kaadlawon.



Ang nakaangkon og ubay-ubay nga bun-og giilang si Ronald Lynn Napes,43, ulitawo ug lumad nga taga California sa Estados Unidos. Samtang walay natumbok ang biktima kun kinsa ang mikulata kaniya gumikan kay gilamok siya sa mga kustomer.

Sumala pa sa imbestigasyon sa TRS, kauban sa biktima ang iyang higalang babaye nga nag-inom diha sa Sambag Store sa nahisgutang dapit dihang namatikdan nalang niya nga nawala ang iyang Nokia 6170 nga cellphone nga gipatong sa lamesa.

Sa kasagmuyo niini gikatahong nagpataka'g panudlo ug namasangil ang biktima ngadto sa ubang mga kustomer sa imnanan maong gitabangan hinuon kini og kulata, atol sa kaguliyang nawala na usab ang lain pa niyang cellphone nga usa ka Ericson A4 nga nagkantidad og P3,500.

Apan narekober ra kini ni SPO3 Raul Magdadaro sa TRS nga miresponde atol sa imbestigasyon ug pagsukit-sukit sa maong dapit ang Erison A4 unang nawalang cellphone sa nga nagbalor og P12,800 wala na makit-i sa kapolisan.